ಸುರಹೊನ್ನೆ
ಕಂಡೆ ನಾನೊಂದು
ಅಪರೂಪ ಕುಸುಮವನು,
ಬಳಿಸಾರಿ ಕೇಳಿದೆನದನು
ನಿನ್ನ ಹೆಸರೇನೆಂದು ;
ಬರಿದೆ ತಲೆಯಾಡಿಸುತ,
ನಗುವೇ ಅದರಾ ಮೊಗದ
ಹೆಗ್ಗುರುತು ತಾನಾಗಿರಲು
ಹೆಸರಲಿನ್ನೇನಿಹುದು :
ಹೃದಯದಾ ಬಳಿ ತಂದು
ಕೇಳಿದೆನು ಅದ ನಾನು
ಬಂದೆ ನೀನೆಲ್ಲಿಂದ,
ನಿನ್ನ ನೆಲೆಯಾವುದು ?
ಹೃದಯಕ್ಕೊರಗಿದ ಹೂವಿನಾ
ಮುಗುಳುನಗೆಯೆನಗರುಹಿತ್ತು,
ನನ್ನನರಿತವರ ಮನವೆನ್ನ
ಚಂದದರಮನೆಯು :
ಹೂಮೊಗವನು ಎತ್ತಿ
ಬಗ್ಗಿ ಪಿಸುದನಿಯಲ್ಲಿ,
ನಿನ್ನದೆಂತಹ ಭಾಷೆ
ಎಂದು ನಾ ಕೇಳುತಿರೆ:
ಸುಗಂಧ ಸೌರಭವೇ
ನನ್ನ ಮಾತಾಗಿಹುದೆಂದ,
ಅದರ ಮೌನದಿಂದಲೇ
ನನ್ನ ಉಸಿರಿಗರಿವಾಯ್ತು!
ನನ್ನ ನೀ ಮರೆಯುವೆಯಾ ?
ಎಂದು ಕೇಳಲು ನಾನು
ಬರಿದೇ ನಗುತಲಿ ಸುಮವು
ತಲೆ ಬಾಗಿ ನಿಂದಿರಲು;
ಅರಿವಾಯ್ತು ನನಗಾಗ
ಮುಂದೊಮ್ಮೆ ಇಲ್ಲಿಂದ ನಾ
ಹೊರಟು ಬಂದಾಗ, ಸುಮದ
ಕನಸಿನಲಿ ನಾನಿರುವೆನೆಂದು!
ಶ್ರೀವಲ್ಲಿ ಮಂಜುನಾಥ
(ರವೀಂದ್ರರ ಒಂದು ಕವನದ ಪ್ರೇರಣೆ)
