ಹರಿಗೋಲಲ್ಲಿ…!

Post Views: 194

ಎಡಕ್ಕೆ ನೀನು
ಬಲಕ್ಕೆ ನಾನು
ಅಥವ ಅದಲು ಬದಲು
ನಡುವೆ ಬರುವ ಅವನು
ಅಥವ ಅವಳು
ಎಂಬ ಯೋಜನೆಯಲಿ
ಬೆರಗಿನ ಕಥೆ ಬರೆಯಲು
ಜೊತೆಯಾದವರು ನಾವು
ಪ್ರೇಮದ ಕಬಂಧ ಬಿಗಿ
ತೆಕ್ಕೆಯಲಿ ಬಂಧಿಯಾದವರು..

ಹೊಸ ಹರುಷದಲಿ ಇಬ್ಬರು
ಮುಗಿಲೆತ್ತರ ತೇಲಾಡಿದೆವು
ಕೈಕೈ ಹಿಡಿದು ನಡೆದೋಡಿದೆವು
ಸೈಕಲ್ ಸವಾರಿ ಹೋಗಿ
ಮಿಂಚಂತೆ ಹರಿದಾಡಿದೆವು…

ನಂತರ ಒಂದು ದಿನ –
ಹರಿಗೋಲೊಳಗೆ
ರಭಸ ಹರಿವ ನದಿಯೊಳಗೆ
ಝಲ್ಲೆನಿಸುವ ಪುಳಕಕ್ಕೆ
ಹತ್ತಿ ತೇಲಿ ತೇಲಾಡುತ್ತಾ…
ಖುಷಿಯಲಿ ಹಗುರಾಗುತ್ತಾ…
ಹಗುರಾಗಿ ನಕ್ಕು ನಲುಗುತ್ತಾ…
ಹಾಗೆ…
ದಢಕ್ಕನೆ ನೀ ಮಾಯವಾದೆ…!

ಈಜು ಬರದ ನಾನು
ಆ ಕ್ಷಣ
ದಡದಡಿಸಿ
ನಿನ್ನ ಈಜಿನ ಬಲವಿಲ್ಲದೆ…

ಈಗ ನಡುನದಿಯಲ್ಲಿ
ಒಬ್ಬನೇ ಹರಿಗೋಲಲ್ಲಿ…!