ಅಟ್ಟದಿಂ ಬಿದ್ದವನ ದಡಿಯಿಂದ ಬಡಿಯದಿರು
ಮೊಟ್ಟಮೊದಲಿಗೆ ಅವನ ಸಾಂತ್ವಯಿಸಬೇಕು
ಪೆಟ್ಟು ಬಿದ್ದಿರಬಹುದು, ಅದನು ಪರಿಕಿಸಿ ನೋಡು
ಕೆಟ್ಟ ಮಾತಾಡದಿರು- || ಪ್ರತ್ಯಗಾತ್ಮ ||
ಸಾವಿಗಾಗಳುತಿರುವ ಸತ್ತ ಕೂಸಿನ ತಾಯ್ಗೆ
ಸಾವಧಾನದಿ ಬುದ್ಧ ಅವಳ ಸಂತೈಸಿ
ಸಾವು ಕಾಣದ ಮನೆಯ ಸಾಸಿವೆಯ ತಾರೆಂದ
ಸಾವಿರದ ಮನೆಯುಂಟೆ ?- || ಪ್ರತ್ಯಗಾತ್ಮ ||
ನೂರಾರು ಭವಬಾಧೆ ಇರಲಿ, ರಾಮಾಯಣದ
ಪಾರಾಯಣವ ಮಾಡು ಭಯಭಕ್ತಿಯಿಂದ
ತೂರಿ ಬಿಡುವುದು ಗಾಳಿ ಜಳ್ಳು ತೂರುವ ಹಾಗೆ
ತಾರಕೋಪಾಯವಿದು- || ಪ್ರತ್ಯಗಾತ್ಮ ||
ಅಂಬುಧಿಯ ನೀರ್ಕಾದು ಆವಿಯಾಗುವುದೆಂತು !
ಅಂಬರದ ಮೋಡದಲಿ ಅದು ನಿಲ್ವುದೆಂತು !
ತುಂಬಿ ತುಳುಕಿದ ನೀರು ಬುವಿಗೆ ಇಳಿಯುವುದೆಂತು !
ಅಂಬುಜಾಸನ ಬಲ್ಲ- || ಪ್ರತ್ಯಗಾತ್ಮ ||
![](http://sahityamaithri.com/wp-content/uploads/2021/10/Nenamshi-2.jpg)
ಎನ್. ಶಿವರಾಮಯ್ಯ ‘ನೇನಂಶಿ’