ಗುರಿಯು ಹಿರಿಯದಾಗಿರಲಿ ತಲುಪದಿದ್ದರೂ ಸರಿಯೆ
ಕಿರಿಯ ಗುರಿ ತಲುಪಿದರೂ ಪ್ರತಿಫಲವು ಕಡಿಮೆ
ಹಿರಿಯ ಚೇತನವೆಲ್ಲ ಇದನೆ ಬೋಧಿಸುತಿಹವು
ಹಿರಿಮೆಗದು ಹೆಗ್ಗುರುತು- || ಪ್ರತ್ಯಗಾತ್ಮ ||
ಅಟ್ಟವೇರದ ಮನುಜ ಬೆಟ್ಟ ಏರುವನೇನು ?
ಮೆಟ್ಟಿಲನು ಒಂದೊಂದೆ ಹತ್ತಿ ಗುರಿ ಮುಟ್ಟು
ಮೊಟ್ಟಮೊದಲಿಗೆ ಕುಳಿತು ಆಮೇಲೆ ಮಲಗುವುದು
ಇಷ್ಟು ತಿಳಿದರೆ ಸಾಕು- || ಪ್ರತ್ಯಗಾತ್ಮ ||
ಯಾರ ನಾಮದ ಬಲದಿ ಕಡಲ ಜಿಗಿದನೊ ಹನುಮ
ಆ ರಾಮ ಅಂಬುಧಿಗೆ ಸೇತುವೆಯ ಕಟ್ಟಿ
ವೀರ ಲಕ್ಷ್ಮಣನೊಡನೆ ಕಡಲ ದಾಟಿದನಂತೆ !
ಯಾರ ಬಲ ಹೆಚ್ಚಾಯ್ತು?- || ಪ್ರತ್ಯಗಾತ್ಮ ||
ಉಟ್ಟ ಪಂಚೆಯು ಕಳಚಿ ಜಾರಿ ಬೀಳುತಲಿರಲು
ಥಟ್ಟೆಂದು ಕೈಗಳದ ಬಿಗಿದು ಕಟ್ಟುವುದು
ಕಷ್ಟದಲ್ಲಿರುವವಗೆ ತಾನೆ ನೆರವಾಗುವನು
ಶ್ರೇಷ್ಠ ಮಟ್ಟದ ಗೆಳೆಯ- || ಪ್ರತ್ಯಗಾತ್ಮ ||
ಎನ್. ಶಿವರಾಮಯ್ಯ ‘ನೇನಂಶಿ’
