ಬೊಂಬೆಯಾಟವಯ್ಯ ಹಾಡಿನ ಖ್ಯಾತಿಯ ಉಮೇಶ್ ಇನ್ನಿಲ್ಲ
ಕನ್ನಡದ ಹಿರಿಯ ನಟರಾದ ಎಂ. ಎಸ್. ಉಮೇಶ್ ಅವರು ಕನ್ನಡ ರಸಿಕರನ್ನು ಅಗಲಿದ್ದಾರೆ.
ಬಾಲ್ಯದಿಂದ ರಂಗಭೂಮಿಯಲ್ಲಿ ಬೆಳೆದ ಉಮೇಶ್ ಅವರು ತಮ್ಮ ಐದನೇ ವಯಸ್ಸಲ್ಲೇ ನಟನೆಗೆ ಎಂಟ್ರಿ ಕೊಟ್ಟಿದ್ದರು. ಕೆ ಹಿರಣಯ್ಯ ಅವರ ನಾಟಕ ಕಂಪನಿಯಲ್ಲಿ ಬಣ್ಣ ಹಚ್ಚಿದರು.
ಉಮೇಶ್ ಅವರ ಅಪ್ಪ ಕಂಪನಿ ನಾಟಕದಲ್ಲಿ ಸ್ರ್ರೀ ಪಾತ್ರ ಮಾಡುತ್ತಿದ್ದರು. ಅವರಿಗೆ ಹನ್ನೊಂದು ಮಕ್ಕಳಿದ್ದರು. ಅವರಲ್ಲಿ ಉಮೇಶ್ ಎಂಟನೆಯವರು. “ಆಗ ಫ್ಯಾಮಿಲಿ ಪ್ಲಾನಿಂಗ್ ಗೊತ್ತಿರಲಿಲ್ಲ. ಆದಕಾರಣ ನಾನು ಹುಟ್ಟಿದೆ” ಎಂದು ತಮ್ಮ ಹುಟ್ಟಿನ ವಿಷಯದಲ್ಲಿ ಕೂಡ ಹಾಸ್ಯ ಸ್ಫುರಿಸುತ್ತಿದ್ದರು.
“ಕಳಬೇಡ ಕೊಲಬೇಡ” ಎಂಬ ವಚನ ಹೇಳುವ ಬಾಲನಟನಾಗಿ ಅವರ ರಂಗ ನಂಟು ಆರಂಭವಾಯ್ತು” ಎನ್ನುತ್ತಿದ್ದರು ಉಮೇಶ್.
ತಾವು ರಂಗಭೂಮಿಗೆ ಬಂದಿದ್ದು ಉದರ ಪೋಷಣೆಗಾಗಿಯೇ ವಿನಃ ಕಲಾವಿದರಾಗಬೇಕೆಂದಲ್ಲ. ಅದರೆ ಬಾಲ್ಯದಿಂದಲ್ಲೂ ವೃತ್ತಿ ರಂಗಭೂಮಿಯಲ್ಲಿಯೇ ಇದ್ದ ಕಾರಣ ನಟನೆ ಸಹಜವಾಗಿಯೇ ಬಂತು. ನಟನೆಯಲ್ಲದೇ ರಂಗಭೂಮಿಗೆ ಬೇಕಾದ ಎಲ್ಲಾ ಸ್ತರಗಳೂ ಮೈಗೂಡಿತು. ಕೆ ಹಿರಣಯ್ಯ ನಾಟಕ ಮಂಡಳಿಯು ಮುಚ್ಚಿದಾಗ ಗುಬ್ಬಿ ವೀರಣ್ಣ ಅವರ ಕಂಪನಿ ಅವಕಾಶ ಕೊಟ್ಟಿತು. ಅಲ್ಲಿ ದಿಗ್ಗಜಗಳ ಜೊತೆಗಿನ ಕಲಾ ಪಯಣ ಉಮೇಶ್ ಪಕ್ವವಾಗಲು ಪೂರಕವಾಯ್ತು.
ಮುಂದೆ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟರು. ೧೯೫೯ರಲ್ಲಿ ಅಭಿನಯಿಸಿದ್ದ ಇವರ ಚಂದ್ರಹಾಸನ ಪಾತ್ರ ಪಡೆದ ಜನಮೆಚ್ಚುಗೆಯಿಂದ ಬಿ. ಆರ್.ಪಂತುಲು ಅವರ ‘ಮಕ್ಕಳ ರಾಜ್ಯ’ ಚಲನ ಚಿತ್ರಕ್ಕಾಗಿ ಪ್ರಧಾನ ಪಾತ್ರಕ್ಕೆ ಆಯ್ಕೆಯಾದರು. ಇವರನ್ನು ಹೀಗೆ ಆಯ್ಕೆಮಾಡಿದ್ದವರು ಅಂದಿನ ದಿನದಲ್ಲಿ ಪಂತುಲು ಅವರ ಸಹಾಯಕರಾಗಿದ್ದ ಎಸ್. ಆರ್ ಪುಟ್ಟಣ್ಣ ಕಣಗಾಲರು. ಈ ಮಧ್ಯೆ ನಾಟಕಕಾರ ಎಚ್.ಕೆ. ಯೋಗಣ್ಣವರ ಉದಯ ಕಲಾ ನಾಟಕ ಮಂಡಲಿಯಲ್ಲಿ ಇವರು ಕೆಲ ಕಾಲ ನಟನಾ ವೃತ್ತಿಯಲ್ಲಿದ್ದರು. ಆಗ ಇವರ ಅಣ್ಣ ಎಂ ಎಸ್ ಸತ್ಯು ಅವರು ಹೆಚ್ಚು ಜನಪ್ರಿಯರಾಗಿದ್ದರು. ಅವರಂತೆಯೇ ಉಮೇಶ್ ಕೂಡ ಹಾಸ್ಯ ಪಾತ್ರಗಳಲ್ಲಿ ಹೆಸರಾದರು.
“ಅಯ್ಯೋ, ಅಪಾರ್ಥ ಮಾಡ್ಕೋಬೇಡಿ ತಪ್ಪಾಯ್ತು…” ಎನ್ನುವ ಹಾಸ್ಯ ಸನ್ನಿವೇಶಗಳಂತಹ ಪಾತ್ರಗಳಲ್ಲಿ ಜನರನ್ನು ರಂಜಿಸುತ್ತಾ ಬಂದಿದ್ದರು.
ವರನಟ ರಾಜಕುಮಾರ್ ಅವರ ಚಿತ್ರಗಳಲ್ಲಿ ನಿಲಯದ ಕಲಾವಿದರಂತಿರುತ್ತಿದ್ದರು. ವೃತ್ತಿ ರಂಗಭೂಮಿಯಿಂದ ಬಂದಿದ್ದ ಕಾರಣ ಬಾಲಕೃಷ್ಣ ಹಾಗೂ ಉಮೇಶ್ ಅವರ ಮೇಲೆ ವಿಶೇಷ ಪ್ರೀತಿ ಇತ್ತು.
ಉಮೇಶ್ ಅವರು ನಟನೆ ಅಲ್ಲದೇ ಸಾಹಿತ್ಯ ಸಂಗೀತ, ಹಾಗೂ ಚಿತ್ರರಂಗದ ಹಲವು ಕ್ಷೇತ್ರಗಳಲ್ಲಿ ತೊಡಗಿಕೊಂಡಿದ್ದರು.
“ಶ್ರುತಿ ಸೇರಿದಾಗ” ಚಿತ್ರದಲ್ಲಿ ” ಬೊಂಬೆಯಾಟವಯ್ಯ… ” ಹಾಡಿನ ದೃಶ್ಯದಲ್ಲಿನ ಆಂಗೀಕಾಭಿನಯ ಕನ್ನಡಿಗರು ಮರೆಯುವಂತೆಯೇ ಇಲ್ಲ. ಈ ದೃಶ್ಯದಲ್ಲಿನ ಅಣ್ಣಾವ್ರ ಶಾರೀರ, ಉಮೇಶ್ ಅವರ ಶರೀರ ನೋಡಿ ಆನಂದಿಸಿದವರೇ ಧನ್ಯರು.
ನಾನು ಹೈದರಾಬಾದಿನಲ್ಲಿ ಕೆಲಸ ಮಾಡುವ ಸಂದರ್ಭದಲ್ಲಿ ಒಮ್ಮೆ ಹೈದರಾಬಾದ್ನಿಂದ ಬೆಂಗಳೂರಿಗೆ ಬಸ್ನಲ್ಲಿ ಪ್ರಯಾಣಿಸುವಾಗೊಮ್ಮೆ ಉಮೇಶ್ ಸಿಕ್ಕಿದ್ದರು. ಆಗ ಆ ಬಸ್ ಊಟಕ್ಕೆ ನಿಲ್ಲಿಸಿದಾಗ ಅವರೊಂದಿಗೆ ಮಾತಾಡುವ ಅವಕಾಶ ಸಿಕ್ತು. ಅವು ಯಾವುದೇ ಹಮ್ಮು-ಬಿಮ್ಮು ಇಲ್ಲದೇ ಸರಳ ವ್ಯಕ್ತಿಯಂತೆ ಮಾತಾಡಿದರು. ಸೆಲೆಬ್ರೇಟಿಯ ಥರ ಇರಲೇ ಇಲ್ಲ. ಡೌನ್ ಟು ಅರ್ಥ್ ಅನ್ನು ಅಕ್ಷರ ಸಹಃ ಸಾಬೀತು ಮಾಡಿದ್ದರು. ಆಗೆಲ್ಲ ಈಗಿನಂತೆ ಮೊಬೈಲ್ ಇರಲಿಲ್ಲ, ಹಾಗಾಗಿ ಸೆಲ್ಫಿಯ ಕಾಟವೂ ಇಲ್ಲದೇ ಕನ್ನಡ ಸಿನಿಮಾಗಳ ಹಾಸ್ಯ ಪಾತ್ರಗಳ ಬಗ್ಗೆ ಮಾತಾಡಿದೆವು. ಆ ಪಯಣವು ಉಮೇಶ್ ಅವರ ಈಗಿನ ಅಂತಿಮ ಪಯಣದ ಸಮಯದಲ್ಲಿ ಮತ್ತೆ ಮತ್ತೆ ಕಾಡುತ್ತಿದೆ… ಹೋಗಿ ಬನ್ನಿ ಉಮೇಶಣ್ಣ, ತಾವು ನಮ್ಮನ್ನು ತಮ್ಮ ಜೀವನ ಪೂರ ನಗಿಸಿದ್ದೀರ, ಅವನ್ನೇ ಮತ್ತೆ ಮತ್ತೆ ನೋಡಿ ಆನಂದಿಸುವೆವು… ಹೋಗಿ ಬನ್ನಿ… ಅಣ್ಣಾ…
ತುಂಕೂರು ಗುರುದತ್
