ಮನವ ಗೆದ್ದ ಪರಿ
ಮನಸನು ಅಪಹರಿಸಿ ಚಣದೊಳು
ನೀ ಬೇಸರಿಸಿ ಹೋಗಿದ್ದಾದರೂ ಎತ್ತ!
ಕನಸನು ಚೂರಾಗಿಸಿ ಕಣಕಣದಲಿ..
ಮತ್ತೆಂದು ಬರುವೆ ನೀ ಮನದತ್ತ!!
ಹಿತಮಿತ ಮಾತಿನಲಿ ತಲೆದೂಗಿಸಿ
ಕತ್ತಲ ಇರುಳಲಿ ಮರೆಯಾಗಿ ಹೋದೆ!
ನಿನ್ನ ಸವಿಗನಸುಗಳ ಮಾಲೆ ಧರಿಸಿ..
ಆ ರಾಧೆಯಂತೆ ನಾ ದಿನವೂ ಕಾದೆ!!
ಕಳೆದ ಜನುಮದ ಮೈತ್ರಿಯ ಬೆಸೆವ
ಆತ್ಮಬಂಧುವೇ ನೀನಾದೆ ನನಗೆ!
ಪನ್ನೀರ ಹನಿಯಂತೆ ಒಲವ ಹರಿಸುವ..
ಆ ಗುಳಿಕೆನ್ನೆಯ ನೋಟದಲೇ ಬೆಸುಗೆ!!
ಪದಗಳನು ಮುತ್ತಂತೆ ಅಣಿಯಾಗಿಸಿ
ಕವಿತೆ ಬರೆಯಲು ಆಗದು ನನಗೆ!
ಜನುಮಗಳ ಪ್ರೀತಿಯ ಬಂಧಿಸಿ..
ನುಡಿತೋರಣವಾಗಿಸಿ ಅರ್ಪಿಸಲೇ ನಿನಗೆ!!
ಸುಮನಾ ರಮಾನಂದ
