ಮಾಯೆ – ಅಲ್ಲಮನ ವಚನಪ್ರೇರಿತ ಕಾದಂಬರಿ

ಮಾಯೆ – ಅಲ್ಲಮನ ವಚನಪ್ರೇರಿತ ಕಾದಂಬರಿ

ಪುಸ್ತಕದ ಹೆಸರು: ಮಾಯೆ
ಪ್ರಕಾರ: ಕಾದಂಬರಿ
ಲೇಖಕರು: ಆಶಾ ರಘು
ಮುದ್ರಣ: 2
ಪ್ರಕಾಶನ: ಉಪಾಸನ ಬುಕ್ಸ್
ಪುಟಗಳು: 242
ಬೆಲೆ: 320/-
ಮೊಬೈಲ್: 9008122991

‘ಮಾಯೆ’ ಕಾದಂಬರಿಯ ವಸ್ತು ಅಲ್ಲಮನ ವಚನದಿಂದ ಪ್ರೇರಿತವಾದದ್ದು.

ಹೊನ್ನು ಮಾಯೆಯೆಂಬರು ಹೊನ್ನು ಮಾಯೆಯಲ್ಲ
ಹೆಣ್ಣು ಮಾಯೆಯೆಂಬರು ಹೆಣ್ಣು ಮಾಯೆಯಲ್ಲ
ಮಣ್ಣು ಮಾಯೆಯೆಂಬರು ಮಣ್ಣು ಮಾಯೆಯಲ್ಲ
ಮನದ ಮುಂದಣ ಆಸೆಯೇ ಮಾಯೆ ಕಾಣಾ ಗುಹೇಶ್ವರ

ಈ ವಚನದಂತೆಯೇ, ಒಬ್ಬ ವ್ಯಕ್ತಿ ಹೊನ್ನು, ಹೆಣ್ಣು, ಮಣ್ಣುಗಳ ಆಸೆಗೆ ಬಿದ್ದು ದಕ್ಕಿಸಿಕೊಳ್ಳಲು ಹೊರಟು ಅತೀವವಾದ ಘಾಸಿಗೆ ಒಳಗಾಗಿ, ಕಡೆಗೆ ಈ ಮೂರನ್ನೂ ಪಡೆಯುವಲ್ಲಿ ತನಗಿದ್ದ ಅಪಾರವಾದ ಆಸೆಯೇ ಕಾರಣ ಎಂದು ಕಂಡುಕೊಳ್ಳುವಂತಹ ಕಥಾ ಹಂದರದ ಕಾದಂಬರಿಯಿದು. ಕಾದಂಬರಿಯ ನಾಯಕ ಪರಸ್ತ್ರೀಯನ್ನು ತನ್ನವಳನ್ನಾಗಿಸಿಕೊಳ್ಳಲು ಇನ್ನಿಲ್ಲದ ಹಾಗೆ ಯತ್ನಿಸಿ ಅತೀವ ದುಃಖಕ್ಕೆ ಒಳಗಾಗುತ್ತಾನೆ. ಪರರ ಭೂಮಿಯನ್ನು ಆಕ್ರಮಿಸಿಕೊಳ್ಳುವ ಪ್ರಯತ್ನದಲ್ಲಿ ರಕ್ತಪಾತಕ್ಕೆ ಕಾರಣವಾಗಿ ಸೆರೆವಾಸ ಅನುಭವಿಸುತ್ತಾನೆ. ನಿಧಿಶೋಧದ ಬೆನ್ನು ಹತ್ತಿ ಊರೂರು ಸಂಚರಿಸಿ, ನಾನಾ ರೀತಿಯ ಅಕೃತ್ಯಗಳನ್ನು ಎಸಗಿ ಇನ್ನೇನು ನಿಧಿ ದಕ್ಕಿತು ಎನ್ನುವುದರಲ್ಲಿ ಪ್ರಾಣಕ್ಕೇ ಕುತ್ತು ತಂದುಕೊಳ್ಳುತ್ತಾನೆ. ಈ ಮೂರಕ್ಕೂ ಒಂದಕ್ಕೊಂದು ಸಂಬಂಧವಿದೆಯೇ? ಅಥವಾ ಮೂರರ ಸಮಾನ ಅಂಶ ಯಾವುದು ಎಂದು ಚಿಂತಿಸುವಾಗ ಅವನಿಗೆ ‘ಆಸೆ’ ಎನ್ನುವ ಉತ್ತರ ಗೋಚರಿಸುತ್ತದೆ! ಆಸೆಯನ್ನು ಮೀರುವ ಪ್ರಯತ್ನವೂ, ಸರಳವಾದ ಬದುಕನ್ನು ಕಟ್ಟಿಕೊಳ್ಳುವ ಪರಿಯೂ ಅದರ ಮುಂದಿನ ಕಥೆ. ಜಯಕೀರ್ತಿಯ ಸುದೀರ್ಘ ನಿಧಿಶೋಧ ಕಾರ್ಯ, ಮದನನ ಜನ್ಮರಹಸ್ಯ, ವೈಶಾಲಿಯ ಪಾಡು, ವೇಶ್ಯೆ ಸನಕವ್ವನ ಅಂತರಂಗ, ಮಂಗಳೆಯ ತವರಿನ ಹಿನ್ನೆಲೆ, ಹೆಣ್ಣೊಬ್ಬಳ ಸಹಗಮನದ ಚಿತ್ರಣ ಮೊದಲಾದ ವಿವರಗಳು ಓದುಗರಿಗೆ ಆಸಕ್ತಿದಾಯಕವೆನಿಸುತ್ತವೆ.

ಈ ಕಾದಂಬರಿಯು, ಸೇಡಂನ ‘ಅಮ್ಮ ಪ್ರಶಸ್ತಿ’ ಯನ್ನು ಹಾಗೂ ಕರ್ನಾಟಕ ಲೇಖಕಿಯರ ಸಂಘದ ತ್ರಿವೇಣಿ ದತ್ತಿ ಪ್ರಶಸ್ತಿಯನ್ನು ಪಡೆದಿದೆ.

ಪುಸ್ತಕ ಕೊಳ್ಳಲು ಆಸಕ್ತಿ ಉಳ್ಳವರು ಮೊಬೈಲ್ ಸಂಖ್ಯೆ 9008122991 ಕ್ಕೆ ಸಂಪರ್ಕಿಸಿ.

ಸಾಹಿತ್ಯಮೈತ್ರಿ ತಂಡ