ಹಣತೆಯ ಜೀವಿ!
ಕತ್ತಲ-ಬೆಳಕ ಮಿಣುಕು!
ಕತ್ತಲು ಒಳಗೋ, ಹೊರಗೋ!?
ಬೆಳಕು ಒಳಗೋ, ಹೊರಗೋ!?
ಕಾಡ ಗಾಢಾಂಧಕಾರದಲ್ಲಿ
ಸಾವಿರಾರು ಮಿಣುಕು ಹುಳುಗಳದ್ದೇ
ದೀಪದ ಮೆರವಣಿಗೆ!
ತನ್ನ ಮುಂದಿನ ಕತ್ತಲ ಸೀಳಿಕೊಂಡು
ಹಾರುವ ಈ ಪುಟ್ಟ ಹುಳು
ಹಿಂದುಳಿದವರಿಗೆ ಬೆಳಕಾಗಿದೆ!
ವಿಜ್ಞಾನಿಗಳು ರೇಡಿಯಂ ಅನ್ನು
ಕಂಡು ಹಿಡಿಯುವ ಮುನ್ನವೇ…
ಸೃಷ್ಟಿಕರ್ತನೇ ಜೀವ-ಜಂತುಗಳಲ್ಲಿ
ಅದನ್ನು ಇಟ್ಟು ಕಳಿಸಿದ್ದಾನೆ!
ಹುಲಿ, ಬೆಕ್ಕು, ನಾಯಿ, ನರಿ
ತೋಳಗಳಂತಹ ಜೀವಿಗಳಲ್ಲಿ
ಕಣ್ಣಾಲಿಯಲಿ ದೀಪ…
ಕತ್ತಲಲ್ಲಿ ಬದುಕುವವರಿಗೆ ಕಣ್ಣ ಬೆಳಕಾಗಿ,
ದಾರಿ ದೀಪವಾಗಿದೆ…
ಈ ಜಗವು ಹೀಗಿದ್ದರೂ ಗೀಜಗವು
ತನ್ನ ಗೂಡಲ್ಲಿ ಬೆಳಕಾಗಿಸಿಕೊಂಡದ್ದು
ಈ ಮಿಣುಕು ಹುಳುವನ್ನೇ!
ಶಕುನಿ ತಾ ತನ್ನ ತಂಗಿ ಗಾಂಧಾರಿಯ
ಕತ್ತಲ ಭಯ ಹೋಗಿಸಲು ಹುಡುಕ ಬಂದದ್ದು
ಈ ಬೆಳಕ ಹುಳುವನ್ನೇ!
ಪುರಾಣದ ಹಿನ್ನೆಲೆಯಿಂದ ಇಂದಿನವರೆಗೂ
ನಮ್ಮೊಂದಿಗಿದ್ದು ಮಿಣುಕುತ್ತಲೇ ಇವೆ…
ಎಲ್ಲ ಕಾಲದ ಕತೆಗಳ ಮೇಲೆ
ಈ ಹುಳು ಮಿಣುಕು ಬೆಳಕ ಬೀರುತ್ತಲೇ ಇವೆ!
ಹಣತೆಗಳು ಕೂತಲ್ಲೇ ಬೆಳಕ ಬೀರುವುದು
ಈ ಮಿಣುಕು ಹುಳುಗಳು
ಕತ್ತಲ್ಲಿದ್ದಲೆಲ್ಲಾ ಸಂಚರಿಸಿ ಬೆಳಕಾಗಿಸುವುದು!
ಗಾಳಿಗೂ ಆರದ, ಹಾರುವ ಹಣತೆಗಳು!
ತುಂಕೂರ್ ಸಂಕೇತ್
