ಸುಡೋಕು – ಕಥಾಸಂಕಲನ

ಸುಡೋಕು – ಕಥಾಸಂಕಲನ

ಪುಸ್ತಕ : ಸುಡೋಕು
ಲೇಖಕರು: ಪ್ರದೀಪ್ ಬೇಲೂರು
ಪ್ರಕಟಣೆ : ಉಪಾಸನ ಬುಕ್ಸ್
ದರ : 130

ಲೇಖಕರ ನುಡಿ

ಇದು ನನ್ನ ನಾಲ್ಕನೇ ಪುಸ್ತಕ. ಮೊದಲು ಬರೆದಿದ್ದು ಕಥಾ ಸಂಕಲನ. ತದನಂತರ ಕಾದಂಬರಿಯ ಕಡೆ ಮನಸ್ಸು ಹರಿಯಿತು. ಕಾದಂಬರಿಯ ಆಳದಲ್ಲಿ ಮುಳುಗಿದ್ದ ನನ್ನ ಮನಸ್ಸು ಕಥೆ ಕಟ್ಟುವಿಕೆಯಲ್ಲಿ ಇರುವ ಸೊಬಗನ್ನು ಮರೆತು ಬಿಟ್ಟಿತ್ತು. ಅದಕ್ಕೆ ಲಗಾಮು ಹಾಕಿ ಮತ್ತೆ ಕಾದಂಬರಿಯ ಕಡೆ ಎಳೆದಿದ್ದೇನೆ. ಎರಡು ಕಾದಂಬರಿಯ ನಂತರ ಮತ್ತೆ ಕಥಾ ಸಂಕಲನದ ಕಡೆ ಹೆಜ್ಜೆ ಇಟ್ಟಿದ್ದೇನೆ.

ಇದರಲ್ಲಿ ಬರುವ ಎಷ್ಟೋ ಕಥೆಗಳು ನಾನು ನೋಡಿದ್ದು ಅಥವಾ ಎಲ್ಲೋ ಓದಿದ್ದು. ಆ ಒಂದು ಸಣ್ಣ ಎಳೆಯನ್ನು ಹಿಡಿದು ಕಥೆ ಕಟ್ಟುವ ಪ್ರಯತ್ನ ಮಾಡಿದ್ದೇನೆ.
ನನ್ನ ಮೊದಲನೇ ಕಥಾ ಸಂಕಲನವು ನನಗೆ ಎರಡು ಸಾಹಿತ್ಯ ಪ್ರಶಸ್ತಿಯನ್ನು ತಂದು ಕೊಟ್ಟಿತು. ಹಾಗೆ ನಾನೂ ಸಹ ಬರೆಯಬಹುದು ಎನ್ನುವ ಒಂದು ಆತ್ಮವಿಶ್ವಾಸ ಮೂಡಿಸಿತು. ಈಗ ನನ್ನ ಎರಡನೇ ಕಥಾ ಸಂಕಲನ ಪ್ರಕಟವಾಗುತ್ತಿದೆ ಎನ್ನುವುದು ಸಂತೋಷದ ವಿಷಯ.
ಎರಡು ವರ್ಷದ ಹಿಂದೆ, ನಾನು ಮೊದಲ ಬಾರಿ ರಾಮಾಯಣದ ಒಂದು ಪಾತ್ರದ ಬಗ್ಗೆ ಕಾದಂಬರಿ ಬರೆದು ನಾನೇ ಪ್ರಕಾಶನ ಮಾಡಬೇಕು ಎಂದು ನಿರ್ಧರಿಸಿದಾಗ ನನಗೆ ಮೊದಲು ಬೆನ್ನುತಟ್ಟಿ ಪ್ರೋತ್ಸಾಹ ನೀಡಿದ್ದು ಆಶಾ ರಘು ಮೇಡಂ. ಆ ಪುಸ್ತಕಕ್ಕೆ ಬೆನ್ನುಡಿಯನ್ನೂ ಅವರು ಬರೆದು ಕೊಟ್ಟರು.
ಈಗ ಈ ಹನ್ನೆರಡು ಕಥೆಗಳನ್ನು ಬರೆದು ಏನು ಮಾಡಲಿ, ಯಾರನ್ನು ಸಂಪರ್ಕಿಸಲಿ ಎಂದು ಯೋಚಿಸುತ್ತಿರುವಾಗ ಮತ್ತೆ ನನಗೆ ಅವರ ಜ್ಞಾಪಕವಾಯಿತು. ಅವರು ‘ಉಪಾಸನ ಪ್ರಕಾಶನ’ ಎನ್ನುವ ಹೊಸ ಪ್ರಕಾಶನ ಶುರು ಮಾಡಿರುವ ವಿಷಯ ತಿಳಿಯಿತು. ತಡ ಮಾಡದೆ ಅವರ ಮುಂದೆ ಈ ಸಂಕಲನವನ್ನು ಹಿಡಿದೇ. ಅವರು ತಕ್ಷಣ ಇದರ ಪ್ರಕಾಶನಕ್ಕೆ ಒಪ್ಪಿದರು. ಅವರಿಗೆ ನನ್ನ ಹೃತ್ಪೂರ್ವಕ ಧನ್ಯವಾದಗಳು.

ಶ್ರೀಯುತ “ಡಾ ಕೊಳ್ಚಪ್ಪೆ ಗೋವಿಂದ ಭಟ್” ಅವರ ಮುನ್ನುಡಿ.

ಸಣ್ಣ ಕಥೆ ಎಂದರೆ ಮಳೆಯೊಂದಿಗೆ ಕಾಣಿಸಿಕೊಳ್ಳುವ ನಲ್ಮಿಂಚಿನಂತೆ. ಕ್ಷಣಮಾತ್ರದಲ್ಲಿ ಅದರ ಹಿಂದಿನ ಕತ್ತಲು, ಬೆಳಕು, ದಿಗಂತ, ಆಕಾಶ, ಮೇಘ ಇತ್ಯಾದಿಗಳನ್ನು ಹೊಳಪಿಸಿ ಆಹ್ಲಾದ ಮೂಡಿಸುತ್ತದೆ. ಸಾಹಿತ್ಯದಲ್ಲಿ ಕಥೆ ಬರೆಯುವುದು ಒಂದು ಸುಂದರ ಅನುಭೂತಿ. ಅದರಲ್ಲಿ ಮೋಹಕ ಮನ ಸೆಳೆಯುವ ಕವಿತೆಯ ಮಾರ್ದವವಿರುತ್ತದೆ. ವಡ್ಡಾರಾಧನೆ, ಪಂಚತಂತ್ರದಿಂದ ಮೊದಲಾಗಿ ಬೆಳೆಯುತ್ತಾ ಬೆಳೆಯುತ್ತಾ ಮಾರ್ಮಿಕ ಮತ್ತು ಕಲಾತ್ಮಕವಾಗಿ ರಂಜಿಸುತ್ತಾ ಬಂದಿದೆ. ಆಧುನಿಕ ಕನ್ನಡ ಸಪುಷ್ಟವಾಗಿ ಹದಗೊಳ್ಳಲು ಮುಖ್ಯ ಕಾರಣಗಳಲ್ಲಿ ವಿರಾಟ್ ರೂಪವಾಗಿ ಬೆಳೆದ ಸಣ್ಣ ಕಥೆಗಳ ವ್ಯಾಪಕ ಬೆಳವಣಿಗೆ ಕೂಡ ಒಂದು. ಬದುಕಿನ ಬೇರೆ ಬೇರೆ ರಂಗಗಳಲ್ಲಿ, ಕ್ಷೇತ್ರಗಳಲ್ಲಿ ದುಡಿಯುತ್ತಿರುವವರು ಕೂಡ ತುಸು ಪರಿಶ್ರಮ ಪಟ್ಟರೆ ಅತ್ಯಂತ ಪರಿಣಾಮಕಾರಿಯಾಗಿ ಮತ್ತು ಮುದವಾಗಿ ಕನ್ನಡವನ್ನು ಬಳಸಿ ಕಥೆ ಕಟ್ಟಲು ಸಾಧ್ಯ ಎಂಬುದು ಅತ್ಯಂತ ಸಂತಸದ ಸಂಗತಿ. ಇದನ್ನು ಯಾಕೆ ಇಲ್ಲಿ ಪ್ರಸ್ತಾಪಿಸಿದ್ದೇನೆಂದರೆ ಪ್ರದೀಪ್ ಬೇಲೂರು ಅವರು ತಮ್ಮ ಸ್ವ ಪ್ರಯತ್ನದಿಂದ ಕಥೆ ಬರೆಯುವುದನ್ನು ರೂಢಿಸಿಕೊಂದಿಡ್ದಾರೆ. ವೃತ್ತಿಯಲ್ಲಿ ಇಂಜಿನಿಯರ್ ಆದರೂ ಬರವಣಿಗೆ ಅವರ ಹವ್ಯಾಸ. ಇವರು ಇದುವರೆಗೆ ಮೂರು ಕೃತಿಗಳನ್ನು ಪ್ರಕಟಿಸಿದ್ದಾರೆ. ಇವರ “ಎಲವೋ ವಿಭೀಷಣ” ಕಥಾಸಂಕಲನಕ್ಕೆ ಎರಡು ಸಾಹಿತ್ಯ ಪ್ರಶಸ್ತಿಗಳು ಬಂದಿವೆ.”ಸುಡೋಕು” ಪ್ರದೀಪ್ ಅವರ ಹೊಸ ಕಥಾ ಸಂಕಲನ. ಇದರಲ್ಲಿ ಒಟ್ಟು ಹನ್ನೆರಡು ಕಥೆಗಳಿವೆ. ವೈವಿಧ್ಯಮಯ ಕಥಾವಸ್ತು ಮತ್ತು ಪ್ರಸ್ತುತಿ ತಂತ್ರವನ್ನು ಇವರು ಈ ಕಥಾ ಸಂಕಲನದಲ್ಲಿ ಬಳಸಿದ್ದಾರೆ. ಮೊದಲ ಕಥೆ ” ಜಗದ್ಗುರುಗಳು ಮತ್ತು ನೂರ್ ಮೊಹಮ್ಮದ್” ಸದಾಶಯವನ್ನು ಬಿಂಬಿಸುವ ಸುಂದರ ಕಥೆ. ಒಂದು ಸಾಮಾಜಿಕ ಚಿಕ್ಕ ಘಟನೆಯನ್ನು ಆಧರಿಸಿದ ಕಥೆ. ಗುರುಗಳು ಮತ್ತು ಭಕ್ತನೊಬ್ಬನ ನಡವಳಿಕೆಯಲ್ಲಿ ವೈಚಾರಿಕ ನಿಲುವನ್ನು ಹೊಂದಿದೆ. ಕಂದಾಚಾರಗಳು ಮತ್ತು ಬಿಗು ನಿಲುವುಗಳನ್ನು ಬಿಟ್ಟು ಮಾನವೀಯ ನಿಲುವು ಓದುಗನನ್ನು ಮೃದುಹೃದಯಿಯನ್ನಾಗಿಸುವಷ್ಟು ಸಹಜವಾಗಿ ಮೂಡಿಬಂದಿದೆ.”ಅಜ್ಜ ಇಲ್ಲ” ಎಂಬ ಕಥೆಯು ತಾತ ಮತ್ತು ಮೊಮ್ಮಗನ ನಡುವಿನ ಸಂಬಂಧವನ್ನು ತಿಳಿಸುವ ಕಥೆ. ಸಾವಿನ ಕುರಿತು ಗೊತ್ತೇ ಇಲ್ಲದ ಪುಟ್ಟ ಬಾಲಕನೊಬ್ಬನ ಮುಗ್ಧ ಭಾವಗಳನ್ನು ಪ್ರತಿಬಿಂಬಿಸುವ ಚಿತ್ರಣವನ್ನು ಈ ಕಥೆಯಲ್ಲಿ ಕಾಣಬಹುದು.ಇನ್ನೊಂದು ಕಥೆ “ಸುಡೋಕು” ಶೀರ್ಷಿಕೆಯಿಂದ ಗಮನ ಸೆಳೆಯುತ್ತದೆ. ಇದೊಂದು ಪತ್ತೆದಾರಿ ಕತೆ ಎನ್ನಬಹುದು. ಒಂದು ಕೊಲೆಯ ಜಾಡು ಹಿಡಿದು ಹೋದಾಗ ಕೊಲೆಗಾರ ಸಿಕ್ಕಿದರೂ ಪೋಲಿಸಿಗೆ ಸಮಾಧಾನ ಸಿಗದು. ಕೊನೆಯಲ್ಲಿ ಯಾರು ಯಾಕೆ ಕೊಲೆಯನ್ನು ಮಾಡಿರುತ್ತಾರೆ ಎಂದು ಕೊಟ್ಟಿರುವ ತಿರುವು ಕಥೆಯನ್ನು ರಂಜಿಸುತ್ತದೆ. “ಅಮ್ಮು ಮೆಚ್ಚಿದ ಕಥೆ” ವಿಶಿಷ್ಟವಾಗಿದೆ. ಬಾಳಿನಲ್ಲಿ ಹೆಚ್ಚೇನು ನಿರೀಕ್ಷೆಯಿಲ್ಲದ ಚಿಕ್ಕ ವಿಶೇಷ ಚೇತನದ ಹುಡುಗಿ ಕಥೆಗಾರ ಬರೆದ ಸ್ಪೂರ್ತಿದಾಯಕ ಕಥೆಯನ್ನು ಕೊನೆಗೂ ಮೆಚ್ಚಿಕೊಳ್ಳುತ್ತಾಳ ಇಲ್ಲವ? ಜೀವನದಲ್ಲಿ ನಿರೀಕ್ಷೆಯನ್ನು ಬೆಳೆಸಿಕೊಳ್ಳುವ ಸಕಾರಾತ್ಮಕ ಸುಂದರ ಕಥೆ ಇದು. ಈ ಕಥೆಯು ಪ್ರದೀಪ್ ಅವರ ಕಥೆ ಕಟ್ಟುವ ಶಕ್ತಿಯನ್ನು ಎತ್ತಿ ತೋರಿಸುತ್ತದೆ.

ಸಂಕಲನದ ಎಲ್ಲಾ ಕಥೆಗಳನ್ನು ವಿಮರ್ಶಿಸುವುದಾಗಲಿ, ಚುಟುಕು ಗೊಳಿಸಿ ಹೇಳುವುದಾಗಲಿ ಇಲ್ಲಿನ ಉದ್ದೇಶವಲ್ಲ. ಕಥೆಗಾರ ಪ್ರದೀಪ್ ಬೇಲೂರು ಅವರ ಹೊಸತನದ ಕಥೆಗಳನ್ನು ಸೃಜಿಸುವ ವಿಶೇಷ ಚತುರತೆ ಎದ್ದು ಕಾಣುತ್ತದೆ. ಈ ಹವ್ಯಾಸಿ ಪ್ರತಿಭಾವಂತ ಕತೆಗಾರರ ಸೃಜನಶೀಲ ಬರವಣಿಗೆ ಇನ್ನೂ ಉತ್ತುಂಗ ಶಿಖರಕ್ಕೆ ಏರಲಿ ಎಂದು ಶುಭ ಹಾರೈಸುತ್ತೇನೆ.

ಪುಸ್ತಕ ಕೊಳ್ಳಲು ಆಸಕ್ತಿಉಳ್ಳವರು ಮೊಬೈಲ್ ಸಂಖ್ಯೆ 9008122991 ಕ್ಕೆ ಸಂಪರ್ಕಿಸಿ.

ಸಾಹಿತ್ಯಮೈತ್ರಿ